15 ліпеня 2023 года аграгарадок Кажан-Гарадок адзначыў свой 530 год нараджэння.
Свята вёскі “Сяло маё цудоўнае на беразе ракі” пачалося песняй “Вёсачка мая” у выкананні народнага фальклорна-этнаграфічнага калектыва “Надзея” Кажан-Гарадоцкай сельскай бібліятэкі-клуба.
З віншаваннямі да жыхароў вёскі звярнуўся старшыня сельвыканкама Іван Карпавіч Зубко. Іван Карпавіч уручыў падарунак бацькам самай маленькай жыхаркі Кажан-Гарадка Пясоцкім Канстанціну і Марыне. Шчырыя віншаванні былі адрасаванны і самаму старэйшаму жыхару вёскі Міхаілу Фёдаравічу Шуляку, які адзначыў у гэтым годзе 98-мы дзень нараджэння. Апладысменты гучалі для сямейных юбіляраў: «залатое» вяселле адзначылі Андруш Іван Пятровіч і Алена Міхайлаўна, Альцывановіч Іван Максімавіч і Вольга Міхайлаўна. Віншаванне і падарунак атрымала самая маладая сям’я Гусціновічаў Андрэя і Анастасіі, якія менавіта у гэты дзень 15 ліпеня зарэгістравалі свой шлюб. У намінацыі “Лепшы двор” заслужаную перамогу атрымала сям’я Пашкевічаў Мікалая Андрэевіча і Тамары Сяргееўны.
Асаблівыя словы падзякі ў гэты дзень прагучалі на адрас працаўнікоў сельскагаспадарчай вытворчасці і прадстаўнікоў самых розных прафесій. Дырэктар КСУП “Гарадоцкі” Сяргей Аркадзьевіч Дублянін уручыў падарункі ветэранам працы Шуляку Аляксею Міхайлавічу і Каратышу Івану Мікалаевічу.
Шчырыя віншаванні і падарункі былі адрасаваны і ветэранам культуры Паўлу Міхайлавічу і Надзеі Фёдараўне Веляскевічам, якія з’яўляюцца родапачынальнікамі калектава “Надзея”. Дырэктар ДУК “Лунінецкая РЦБС” Таццяна Сяргееўна Ванюк у гэты святочны дзень уручыла падзячны ліст сектара культуры Лунінецкага райвыканкама народнаму фальклорна-этнаграфічнаму калектыву “Надзея”, які адзначыў свой 45-гадовы юбілей, а таксама падзячныя лісты усім удзельнікам калектыва.
Павіншаваў з юбілеем жыхароў вёскі і прачытаў свае гумарыстычныя замалеўкі пісьменнік, краявед Васіль Туміловіч. Было на што падзівіцца на выставе народнай творчасці Кацярыны Пятроўны Мікуліч: разнастайныя вышыванкі, саматканыя посцілкі і іншыя прыгожыя рэчы захаплялі вока і былі арыгінальным упрыгожваннем свята.
Радавалі сваімі песнямі народны калектыў “Надзея”, народны ансамбль песні і музыкі “Сустрэча”, Наталля Бярозка, Валянціна Веляскевіч, Вольга Ванюк, Острыкаў Іван, Аўстраленка Марыя і Павел Шэкер. А дзеці сям’і Кавалеўскіх парадавалі сваім танцавальным нумарам.
Свята доўжылася да позняга вечара і стала незабыўнай, цёплай і душэўнай старонкай жыцця Кажан-Гарадка, а закончылася салютам.
Галоўным арганізатарам свята была загадчык Кажан-Гарадоцкай сельскай бібліятэкі-клуба Людміла Германовіч. Людміла Фёдараўна выказвае шчырыя словы ўдзячнасці ўсім, хто дапамог у правядзенні мерапрыемства.