Падведзены вынікі раённага агляду-конкурсу "Бібліятэчнае краязнаўства: тэрыторыя вялікіх магчымасцей», прысвечанага Году малой радзімы. На конкурс былі прадстаўлены летапісы вёсак; зборнікі фальклору, этнаграфічных матэрыялаў, мясцовых дыялектаў; нарысы аб знакамітых земляках; вырабы мясцовых майстроў; сцэнары мерапрыемстваў, якія фарміруюць цікавасць да гісторыі роднага краю і інш. Па выніках конкурсу дыпломамі 1, 2, 3 ступені і каштоўнымі падарункамі ўзнагароджаны Лунінская, Рэдзігераўскае, Дварэцкая сельскія і цэнтральная дзіцячая бібліятэкі. Шэраг бібліятэк адзначаны заахвочвальнымі прызамі. Закончыўся 2018 год, але не закончыўся Год малой радзімы. 2019-2020 гады згодна з Указам Прэзідэнта Рэспублікі Беларусь таксама пройдуць пад знакам Года малой радзімы. І ў бібліятэках па-ранейшаму будуць займацца ўшаноўваннем імёнаў вядомых землякоў; напісаннем гісторый сваіх населеных пунктаў; зборам этнаграфічных, фальклорных, тапанімічных матэрыялаў; правядзеннем асветніцкай працы па вывучэнні гісторыі, культуры, прыроды роднага краю.
