У фонд Лунінецкай цэнтральнай раённай бібліятэкі паступіла новая кніга – “Атлантыда палескай гісторыі Аляксандра Ільіна”. Кніга прысвечана вядомаму гісторыку і краязнаўцу Аляксандру Львовічу Ільіну (1956 – 2020).
Складальнікам кнігі з’яўляецца ўдава Аляксандра Львовіча паэтка і культаролаг Алена Ігнацюк, дзякуючы якой кніга і з’явілася ў лунінецкай бібліятэцы. Аляксандр Ільін – кандыдат навук, выкладаў матэматыку ў шэрагу ўніверсітэтаў. Нарадзіўся ва Украіне, але большую частку жыцця правёў у Беларусі, у апошнія гады жыў і працаваў у Пінску. Матэматык па спецыяльнасці, Аляксандр Львовіч усё жыццё займаўся гістарычнымі даследаваннямі, надрукаваў мноства кніг і артыкулаў, звязаных з гісторыяй Беларусі, Украіны, Расіі, Польшчы. Займаўся ў тым ліку і лунінецкай гістарычнай тэматакай, даследаваў гісторыю Дзятлавіцкага манастыра, пісаў пра творчых асоб, звязаных з Лунінеччынай.
Большая частка кнігі — гэта артыкулы і фрагменты даследаванняў Аляксандра Ільіна, яго перапіска з вядомымі навукоўцамі і літаратарамі розных краін. У першай частцы выдання змешчаны ўспаміны пра А. Ільіна вядомых навукоўцаў, літаратараў, краязнаўцаў. Сярод іншых – артыкулы лунінецкіх краязнаўцаў.
Аляксандр Ільін быў сябрам Лунінецкага краязнаўчага таварыства, што працуе пры Лунінецкай цэнтральнай раённай бібліятэцы. Ён не аднойчы наведваў бібліятэку, удзельнічаў у Лунінецкіх краязнаўчых чытаннях, друкаваўся ў лунінецкіх выданнях. Адну з яго брашур – “Аўген Бартуль – беларускі паэт і старшыня Лунінецкага гарадскога суда” – выдала Лунінецкая цэнтральная бібліятэка.
Кніга “Атлантыда палескай гісторыі Аляксандра Ільіна” зойме пачэснае месца на кніжнай паліцы Лунінецкай цэнтральнай раённай бібліятэкі.